昨天我有帖文表示，會德豐地產推古洞北新盤折實平均呎價為$17,671 每平方呎 ，我回響是：「不如買奧海城二手樓」，$18,000一呎，奧運站或奧海城都應該搵到貨………
有網民說奧海城三寶那有$18000！當然，我不是說大家喺嗰區合埋雙眼都搵到個咁荀既盤；置業，特別用來投資，有時就要等下，甚至要比地產代理黑面潤你：「你搵到呢個價我批個頭比你！」（我曾經為文寫過呢個際遇
)……..
但搵食嘛！就要受下黑面囉！你估買賣樓唔使你勞氣既咩！好辛苦架！少d EQ都頂唔住！
好啦，我地睇睇實際交易數據，睇下過去一季（5月至7月）奧海城三寶二手有無$18000，先以最舊嗰盤維港灣為例，近一季有以下交易，優質海景或高層3房大廳落地玻璃的大單位，好似樓皇第10座，成交呎價當然無$18000啦，甚至高達$22,000 以上，但部分內園景或較低層的2房單位，成交呎價系真有可能$18000既。
當然，咁荀既盤，梗唔系俯拾即是，要等要傾，你最好有個相熟經紀肯幫你跟業主磨啦。
咁你話啦！你寧願耐心等慢慢磨個維港灣$18000 二手盤吖，定痛痛快快入手一個古洞北$18000新盤，幫發展商一Q清袋嗰65個單位？
我就寧願等！
那奧海城「帝柏海灣」和「柏景灣」現時又有$18000呎價嗎？
又真的無！始終相較維港灣，帝柏海灣因為基座直達奧海城核心商場，平均實用呎價一般高出維港灣約 8% 至 12%，帝柏海灣的高層大單位，如1,000呎以上的3房套大戶，市場極為罕有，成交呎價普遍在 $25,000一平方呎 以上；而低層或面對較多周邊樓景的戶型則落在 $20,000 – $21,000一呎左右。
而柏景灣亦無$18000呎價，它跟帝柏海灣共用會所及商場配套，都係同奧海城二期港鐵出口極近，柏景灣稍稍舊過帝柏海灣，價格差距普遍只在 3% 以內，但大多時呎價相約，沒大差距。